Бірнеше жыл бұрын Айдын Рахимбаев туған ауылы Құлынжондағы (ШҚО) мектепке күрделі жөндеу жүргізді. Содан кейін ол ең бастысын қолға алды: мектепке сапалы білімді қайтару. Оның шақыруымен мектеп директоры болып бұған дейін РФМШ директорының орынбасары қызметін атқарған Аралбек Берікұлы келді. Үш жыл ішінде жаңа директор мектептің жұмысын қайта құрды: үлгерімі төмен сыныптарды көтеріп, мұғалімдердің деңгейін арттырды. Ағылшын тілін нөлден бастаған оқушылар Назарбаев Университетіне түсе бастады, ал мектептегі IELTS орташа балы 6.0-ге жетті. Келісімшарт мерзімі аяқталғанда Аралбек ауылда қалуды шешті. Бұрын мектеп жартылай бос тұратын, ал қазір онда орын жетпейді. Сондықтан Айдын әкімдікпен бірлесіп мектеп жанынан интернат пен спорт кешенін салды. Енді мұнда басқа аудандардан келген дарынды оқушылар мен мұғалімдер тұра алады. Жаңа ғимараттардың ашылуына ауылдың 400 тұрғыны жиналды, ал мектеп қайтадан ауылдың жүрегіне айналды.
